الاشعة

قسم_الأشعة: (علمي علوم فقط) : من  اهم اقسام المعهد واللى من غيره مفيش طب فى مصر . 

فى القسم دا بتدرس جميع انواع الأشعة التشخيصية والعلاجية ، وتركيب اجهزة الاشعة والفزياء الاشعاعية طبعا وكيفية اجراء فحوصات الاشعة ومعالجة المريض  بالاشعة وكل ما يخص الاشعة بسلطاتها وبابا غنوجها  

بتتخرج تقدر تشتغل على اجهزة الاشعة العادية X RAY  والمقطعية CT والرنين MRI  وال PET SCAN واشعة الثدى mammography  واشعة العمليات والقسطرة  واى اشعة معدية فى الشارع انت بتعملها ماعدا (السونار) ...دا تخصص طبيب الاشعة الللى متخرج من طب ...كل اللى فات دا اسمه اشعة تشخيصية ..يعنى بنعملها عشان نشوف المريض عنده ايه عشان بعد كدا نقدر نعالجه 

الاشعة حاجة اساسية فى اى مستشفى ...ولأن مفيش حد بيشتغل غير خريج المعهد وخريج طب بس ...ففرص شغله كتير ومتوفرة فى الخاص وممكن بعد وقت كبير تقدر تفتح مركز بس بترخيص طبيب ...دا لو كان معاك فلوس (اسعار اجهزة الاشعة غالية جدا ) 

 طبعا بعد ما تتخرج بتتكلف في مستشفيات التابعة لوزارة الصحة ووزارة العدل ووزارة التعليم العالي وغيرهم من القطاعات الطبية الخدمية 

مجال الاشعة كبيييييييييييييييييييييير جدا ...كبير بمعنى الكلمة ...فلازم باستمرار تطور من نفسك وتقرا اكتر ..فلازم نوضحلك طرق التطور المهنى واللى هى :-

- التكملة الدراسية في المعهد الفني الصحي (سنتين تخصص) او التكملة في كلية علوم صحية (بني سويف-منوفية). 

- التدريب الجيد في المستشفيات وزيادة الخبرة العلمية والعملية.

- حضور الدورات العلمية الاكاديمية المختلفة والحصول علي شهادات الخبرة في مجال الاشعة.

-قراءة والاطلاع على المراجع العلمية والابحاث المنشورة عن الاشعة 

فيه بقا كام نقطة كدا حابين نوضحها بخصوص القسم الجامد زوحليقه دا عشان محدش يضحك عليك 

اول نقطة الفرق بينك وبين طبيب الاشعة فى الشغل ؟

الكلام فى النقطة دى كتير بس انا هكتب الفرق اللى موجود دلوقتى على ارض الواقع واديك فكرة عن اللى مفروض يحصل واللى بنأمل انه يحصل فى المستقبل القريب

بص يمعلم ..حاليا الفرق بينكم على ارض الواقع ان الطبيب بيشتغل السونار وبعد كل اشعة انت بتعملها هو بيكتب تقرير كدا يقول الاشعة فيها ايه  

 دا الكلام اللى موجود على ارض الواقع ...اللى مفروض يتم بقا ان  القسم دا يكون موجود فى كلية العلوم الطبية ويخرج حد يقدر يعمل كل اختصاصات طبيب الاشعة والقسم يتلغى من كلية الطب لان دا مش تخصص طبى بحت ..لكنه قسم مكمل للطب..وطبعا فى ظل الظروف اللى موجودة دلوقتى وقلة عدد الاطباء ..فاحنا اكيد محتاجين الاطباء دول فى تخصصات تانية محدش يقدر يشتغلها غيرهم واللى هي صميم الطب زى الباطنة والجراحة..الخ ونسيب التخصصات البارا دى للناس اللى دارساها بتخصص من اول سنة فى الكلية (طبيب الاشعة خلال سبع سنين تخرجه بيدرس كل ما له علاقة بالطب ولا يختص بالاشعة غير فى سنة الامتياز فقط) ......وبالمناسبة دا اللى تم مع العلاج الطبيعى  ..لإنه بطبيعة الحال زينا قسم مكمل للطب (para medical ) فعلاج طبيعى كان معهد فى الاول ويقابله قسم فى كلية الطب ..وطبعا الوضع دا اتغير واتحول دلوقتى للكلام اللى احنا بنأمل انه يحصل معانا...اتمنى منخلطش بين الوضع الحالى والوضع الصحيح اللى بنتمناه

 تانى نقطة بقا وهيا خطورة الاشعة صحيا

الاشعة خطيرة والتحاليل خطيرة واى مهنة فى العالم خطيرة لو انت شخص مستهتر ومش بتحافظ على اجراءات الوقاية والحماية  فلازم تفهم كويس انك انت اللى ممكن تخلى الاشعة تمرضك ..وانت اللى تقدر تخلى الاشعة ملهاش تأثير عليك 

لازم تفهم اخطار اللى انت بتتعامل معاه عشان متستهونش فتصاب ..وفى نفس الوقت   متبالغش ..

الاشعة خطير و فعلا وسببت سرطان لفنيين فعلا فى مصر بس ..وخلى تحت بس دى الفين خط ...بس حصلت امتى ولمين ....حصلت زمان للفنيين المستهترين اللى مكنوش بياخدوا الاحتياطات وبيكسلوا وللأسف لإن الاعراض مش بتظهر غير على المدى البعيد جدا فكان دا دافع اكبر لإستهتارهم ..والكلام دا كان زمان لإن مكنش فيه التعليم الكافى لفنيين الاشعة (بالمناسبة انت عندك مادة كاملة عن تأثير الاشعة على الجسم وبتاخد عضو عضو فى جسمك وبتدرس ازاى تحمى نفسك )واللى كان بيزيد الطين بلة ان الاجهزة القديمة دى كانت بتسرب نفسها اشعة وبتدى جرعات اشعة اكبر 

انما حاليا كل دا اتظبط ...فمتقلقش من موضوع خطر الاشعة دا نهائى طالما انت حد مش مستهتر فى شغلك وم بتخطط انك تكون مستهتر .. 

 بالنسبة لنقطة تأثير الأشعه علي الحمل بالنسبة للبنات  ده طبعا مبيحصلش عشان البنت بتاخد اجازه في اول 3 شهور من الحمل و بيبعدوها عن الاشعه تماما عشان نتفادى اى احتمالية ولو نادرة انها تأثر على الجنين ...وببيوزعوها على شغل تانى غير الاشعة فى فترة الحمل زى تسجيل بيانات المرضى فمفيش قلق فى الحمل 

مجال الاشعة جميل وحظك فى السما لو كان من نصيبك